Во денешниот извештај на ДЗР за платите и надоместоците кои се делени во СЈО, а според ревизорскиот извештај околу 4,6 милиони евра се исплатени како додатоци за тајност но без законска поткрепа, објавен е и одговорот кој Јанева како одговорно лице на веќе згаснатаото СЈО го доставила како забелешка.
Државниот завод за ревизија го објавил и овој допис на Јанева испратен од Гевгелија во која таа тврди дека додатоците се делени легално согласно специјалниот закон за СЈО и членот 6 од законот.
На врвот на своите забелешки поранешната специјална обвинителка ставила дека станува збор за класифицирана информација, односно пишала доверливо. Јанева во моментот на пишувањето на забелешките се наоѓа во домашен притвор во Гевгелија, каде е и сега по определената мерка за обезбедување, откако првостепено е осудена на 7 години за случајот Рекет.
За извештајот на ДЗР во својата писмена забелешка Јанева наведува дека е порака за сите оние што се борат против криминалот на највисоките функционерски позиции бидејќи отпосле се реагира на нешто што со години било редовна и некритикувана појава.
-Дали пораката која на ваков начин се испраќа е: повеќе никој и никогаш во оваа држава да не се занимава со гонење на висока корупција, на начин како што го правев јас и СЈО, бидејќи на крајот, се ќе биде предмет на преиспитување, како што се случува сега, пост-фестум?- стои во одговорот на поранешната специјална обвинителка и осудена во случајот Рекет, Катица Јанева.
Извор: Телма
