Топол бран со температура од дури 28 Целзиусови степени масовно ги испрати Грците на плажите и во парковите, без оглед на „мерките за затворање“ поради епидемијата на коронавирус.
Според Атинската национална опсерваторија, температурата во Ханија, на јужниот остров Крит, достигнала 28,3 степени околу пладне, што е една од највисоките јануарски температури во последните педесет години.
Типичната температура во овој период од годината во Грција е околу 15 степени. Во Атина, каде термометрите достигнаа 22 степени, луѓето се упатија кон плажите и плоштадите и во парковите.
„Времето е прекрасно, а ние сме претежно заглавени дома“, рече еден човек за телевизијата Скај од плажата Кавури, близу Атина, објаснувајќи зошто е таму со многумина што шетаа, а некои и пливаа.
Топлиот ветар од Африка донесе многу прашина заедно со необичната топлина.
Температурите во Грција се очекува да бидат високи до среда. Полицијата патролираше залудно обидувајќи се да избегне преголема концентрација на населението.
Полициските службеници со мегафони ги потсетуваа луѓето да одржуваат „социјална дистанца“ и ги казнуваа оние кои не носеа маска.
Грција е ставена во карантин од почетокот на ноември, а властите се обидуваат да го избегнат третиот бран на пандемијата по прославата на Божик и Нова година.
Во петокот, ограничувањата, кои требаше да завршат на 11 јануари, беа продолжени за уште една недела. Само градинки и основни училишта се отворени во понеделник. Властите објавија уште 36 смртни случаи во неделата.
Повеќе од 4.000 од вкупно 5.263 смртни случаи за време на епидемијата во Грција се случија во изминатите два месеци.
