Министерството за внатрешни работи вчера уапсило две лица, вработени во МЖ Транспорт, поради злоупотреба на службена положба и овластување. МВР информира дека двете лица биле приведени по претходна пријава од раководно лице во МЖ Транспорт, откако забележал поголема потрошувачка на струја во една од канцелариите и се посомневал дека некој од вработените ги користи службените простории за копање криптовалути.
Постапувајќи по пријава примена во 18.30 часот од страна на раководно лице во Железници на РСМ – Транспорт, според која во канцеларија опремена со компјутери, во која биле неколку вработени, забележал поголема потрошувачка на струја поради што се посомневал во копање на криптовалути, полициски службеници излегле на местото и по преземени мерки и активности ги привеле двете лица вработени Железници, кои ја користеле канцеларијата, при што било извршено и запечатување на просторијата.
По расчистување и документирање на случајот ќе биде поднесен соодветен поднесок.
Да потсетиме дека претходно Инфомакс информираше за злоупотреби со копање на криптовалути во подрумските простори во ГТЦ.
