Покрај авионската линија со шведскиот град Малме, од денеска нискобуџетната авиокомпанијата „Визер“ од охридскиот аеродром почнува да опepира и со редовна линија кон италијанскиот град Милано (Малпенса).
Летовите од и кон Милано до 30 март ќе се реализираат секој вторник и сабота, додека од 1 април во понеделник и во петок. Со додавањето на Малме и Милано како нови дестинации, авиокомпанијата „Визер“ сега од аеродромот „Св. Апостол Павле“ опepиpa на пет редовни линии и тоа за Виена, Базел, Цирих, Малме и Милано.
Охридскиот аеродром сезонски е поврзан со уште осум дестинации и тоа со Амстердам, Брисел, Тел Авив, Варшава, Катовице, Истанбул, Ајндховен и Талин, што ги реализираат 11 авиокомпании. Согласно договорот потпишан со владата, авиокомпанијата „Визер“ е обврзана од јули оваа година да стартува и со реализација на директни летови за Охрид од германските градови Меминген и Дортмунд.
Вршителот на должноста градоначалник на Охрид, Константин Георгиески, смета дека новите линии кон Малме и Милано ќе бидат од големо значење за населението од регионот, а практиката на воведување нови авионски линии кон охридскиот аеродром е во корелација со заложбите на локалната власт за дополнителен развој на туризмот и промоција на Охрид пред новите потенцијални туристички пазари.
