Љубов Мореходова го привлекува вниманието на светот со својот скромен начин на живот и со лизгачките способности.
77-годишната бабичка живее на Сибир и секојдневно лизга на мраз на најдлабокото езеро на светот, Бајкалското Езеро.
Откако почина нејзиниот сопруг во 2011 година, Љубов живее сама, но и покрај тоа, тврди дека е среќна и исполнета. Нејзини единствени пријатели се животните на нејзината фарма, па посветено се грижи за нив.
За да ги надгледува и да се увери дека нејзините крави нема да заминат многу далеку, Мореходова ги става лизгалките, кои во 1943 година ги направил татко ѝ, и лизга по замрзнатото езеро.
„Тука имам сè. Имав можност да го напуштам овој живот откако почина мојот сопруг, но не можев. Знаев дека животот тука е многу тежок. Татко ми работеше напорно со мајка ми. Како би можела да заминам? Како?“ – вели баба Љуба за нејзината одлука да живее сама.
Одвреме-навреме оваа бабичка ја посетува нејзиниот син, а во лето друштво ѝ прават внуците.
„Во лето, кога има многу луѓе им велам: Собери си го ѓубрето, не оставај неред зад себе. Не оставај ѓубре, сè завршува во Бајкалот“ – вели таа и додава дека е среќна онаму каде што е.
„Седам сама во кујната. Седам и го гледам ова. Ме усреќува, ме расположува и си помислувам дека кога некој би седел до мене, би рекол: Каква убавина. Каква неверојатна убавина“ – вели таа.
