„Како ко-претседател на групата во Конгресот за Македонија и Американците со македонско потекло, и како претставник на најголемата македонска популација во САД, посветен сум на одржување и зацврстување на позитивна и заеднички корисна врска меѓу САД и Македонија“, изјави конгресменот Пол Мичел, по вчерашната средба со Обединетата македонска дијаспора (ОМД).
Мичел истакна дека секогаш е добро да се сретне со членовите на ОМД за да разговара за македонската интеграција во НАТО и Европската унија.
На барање на ОМД, Мичел ја сочува и сторијата на Би-Би-Си за македонското малцинство во Грција во архивата на Конгресот.
Претседателот Мето Колоски, пак, е благодарен што конгресменот Мичел работи на зацврстување на односите меѓу двете држави.
„Конгресменот Мичел ни вети дека нема да го користи зборот Северна и оти нашата држава ќе ја вика Македонија. Тој е голем поддржувач на нашето право за самоопределување“, рече Колоски, кој на средбата присуствуваше со Кристина Димитриевски, глобален ко-претседавач на младинскиот огранок на ОМД, Генерација М.
„Секогаш е прекрасно да се видат пријателите од @ОМДијаспора за дискусија за движењето на Македонија кон членството во #НАТО и #ЕвропскаУнија. Како копретседател на Конгресната група за #Македонија и за#МакедонскитеАмериканци и како претставник на една од најголемите македонски популации во Соединетите Држави, посветен сум на одржувањето и зајакнувањето на позитивните и заемно корисни односи меѓу #САД и #Македонија“, напиша конгресменот од Републиканска партија на својот профил на Твитер по средбата со претставници на ОМД.
„Ви благодариме @РепубликанецПолМичел за вашето вистинско пријателство со #Македонија и со #македонско-американската заедница во вашиот дистрикт. Ви аплаудираме што ѝ се обраќате на нашата татковина како #Македонија и силно го поддржувате нашето право на самоопределување. #НикогашСеверна“, реплицира најголемата организација на македонски иселеници во светот, со седиште во Вашингтон.
