Лидерот на Алијансата за иднина на Косово и поранешен косовски премиер Рамуш Харадинај кажа денес во Пеќ дека „војната на УЧК не беше само неопходна, туку и неизбежна“.
„Во спротивно, српскиот геноцид на Косово немаше да биде сопрен“, наведе тој.
Харадинај истакна дека тоа истовремено била и „праведна, одбранбена војна, која е позната и во меѓународното право“.
„Кога сте во опасност, мора да се браните, па тоа се случи и со нашата ослободителна војна, отстранувањето на окупацијата и сопирањето на српскиот геноцид на Косово“, додаде тој.
Оцени дека се неуспешни напорите на ослободителната војна да ѝ се додели друга димензија.
„Сите напори на борбата за ослободување на Косово да ѝ се даде друга димензија се неуспешни од почетокот и секогаш ќе пропаднат. Живи се оние кои можат да прават добри дела, но и да грешат, додека паднаа оние кои ни го трасираа патот“, заклучи Харадинај.
