Пожарот кој пред четири дена избувна во атарот на село Белица Бродско, се уште е активен. Гори поголема површина борова шума во повисокиот дел од планината и токму затоа е тешко да се дејствува од земја.
Во изминатите три дена врз огнената стихија се делуваше и од воздух со хеликоптер од Дирекцијата за заштита и спасување на Македонија. Во трите дена хеликоптерот имаше интервенции по седум наврати, за да го намали интензитетот на неговото ширење.
-Пожарот кај село Белица што во средата избувна во повисоките делови од планината, се уште е активен. Во трите претходни дена на огнената стихија се делуваше од воздух со хеликоптер на ДЗС, а работници на Шумското стопанство и пожарникари беа крај самиот оган и со прирачен алат спречуваа негово натамошно ширење, вели Пецо Стојкоски секретар на Општина Македонски Брод.
Тој напомна дека вчерашните врнежи од дожд го заобиколиле големиот пожар и според прогнозите за денеска, се очекува и во овој дел од земјава да има поинтензивни врнежи од дожд и конечно да се изгасне пожарот.
-Најефикасно решение за да се изгасне големиот шумски пожар кај село Белица е да се остварат прогнозите на метеоролозите кои за денеска попладне најавуваат врнежи од дожд и на овој регион од Порече.Крај огнот се уште се присутни работници од шумското стопанство и пожарникари кои го надгледуваат огнот и со прирачни средства спречуваат негово натамошно ширење, додава Стојкоски.
