Денес се заврши со чистењето на големата депонија по насипот од реката Мала Рада, а во текот на денешниот ден се исчисти и депонијата покрај Хемтекс. Огромни количини на отпад беа отстранети и од оваа локација, во непосредна близина на патот кој води од Пинтија кон Горно Лисиче.
Градоначалникот на општина Кисела Вода, Орце Ѓорѓиевски истакна дека континуирано се работи на лоцирање и расчистување на дивите депонии низ општината, а на нивоместо ќе се создадат зелени површини и паркови за одмор и рекреација на жителите.
„Ние од саботата во континуитет работиме на неколку од мапираните црни точки кои несовесните граѓани ги узурпирале со фрлање на градежен шут, покуќнина и друг цврст отпад. На расчистените диви депонии ќе создаваме зелени површини, паркови кои ќе се користат за прошетки, за одмор и рекреација и затоа сакам да апелирам до сите кои досега се однесувале несовесно и исфрлале отпад на овие диви депонии да се откажат од ваквите намери. Ние мораме да создаваме зелена, чиста и модерна Кисела Вода и да ја одржуваме таква“, изјави Ѓорѓиевски.
