Половина од децата родени во 2017 година не се вакцинирани со МРП вакцина, а во скопско Радишани, веќе се потврдени седум случаи на ситни сипаници и е прогласена епидемија во градинката „Ташко Караџа“.
Здравствените власти оваа состојба ја припишуваат на антивакциналните кампањи кои се шират долг период, но, нема допрецизирање за квалитетот на вакцините.
Министерот за здравство, Венко Филипче е категоричен: Во градинка и училиште да се примаат само оние деца кои се вакцинирани. А во меѓувреме, претставници од здравство, образование и труд и социјала, бараат правна регулатива вакцините да бидат задолжителни за упис во градинка или училиште.
Веќе подолг временски период, голем број на родители, поради страв го одложуваат вакцинирањето на децата, па чекаат, нивното дете да покаже први знаци на добар развој пред да го однесат да прими вакцини.
Mожни компликации од морбили се воспаление на средното уво, белите дробови и мозокот. Специфичен лек не постои, но вакцинацијата е исклучително ефикасна во превенција на заболувањето.
