Високите плати кои неретко достигнуваат и до 180.000 денари месечно, флескибилноста на работата како и фактот што М-НАВ е акционерско друштво, се само дел од причините ова претпријатие да стане мета на политичарите, кои редовно вршат притисоци и си ги вработуваат сопствените семејни членови
„Преместуваат работници, примаат нови, по разно-разни, само не стручни критериуми. Како може на ќерката на една политичарка да и направат корекција на коефициентот и сега платата од 90.000 да ѝ скокне на 120.000 денари? И врз основа на што сестрата на друг политичар е префрлена во сектор со третина повисока плата, а да не ви кажувам како ја вработија, пред да се смени власта? И како во секторот за безбедност, преку ноќ, бројот на работници е дуплиран? А, таму се највисоки административните плати“, вели вработен во М-НАВ за весникот „Независен“, кој сакал да остане анонимен.
Ваквите тврдења од менаџментот на М-НАВ ги отфрлаат, а вината ја префрлаат врз Агенцијата за цивилно воздухопловство. Имено, од М-НАВ велат дека вработувањата на нови лица било поради пополнување на испразнетите места, поради пензии или откази на претходно вработени лица.
Од Агенцијата пак, со индигнација ги отфрлаат овие информации и велат дека тие немаат никаква врска со организација, функционалност и кадровски обновувања на М НАВ, бидејќи истите се во надлежност на Надзорниот одбор на компанијата.
М-НАВ не е буџетски корисник туку парите за работа ги добива од прелетите и од користењето на пистата, а му ги префрлува Еуроконтрол – Европската организација за безбедност и воздушна пловидба. Поради високите плати е во видокруг и на јавноста и на политичарите. Секторот за безбедност, кој има последен збор за безбедноста на опремата и на процедурите за работа, и врз кој е најголем притисокот за вдомување кадри, е со највисоки административни плати. Над нив се само оние на контролорите на летање, кои почнуваат од 90.000 и одат до 180.000 денари – пишува „Независен“
Вработени во М-НАВ за весникот тврдат дека недостасуваат околу 20 контролори на летање, бидејќи поголемиот дел од актуелните веќе ги исполнуваат условите за пензија, а голем дел од нив веќе се со намалена способност, согласно на тоа намалена е и безбедноста на летање. Наместо тоа, велат вработени за весникот, во М-НАВ се вработуваат административци кои земаат огромни плати, а немаат никаква функционална вредност за претпријатието.
