Сметам дека обичниот албански човек не е многу засегнат во врска со барањата од платформата. За нејзините точки прв започна да ги зборува Зоран Заев во изминатата година, а не смееме да заборавиме и дека голем дел од платформата беше цитирана и во Берн во Швајцарија, што практично ги подгреа страстите во Република Македонија, истакна Љупчо Пренџов од ГРОМ.
„Ова што се случува во Македонија ги помина сите граници, не е во ред да наседнуваме на провокации од Тирана. За нас е важно што Македонија овие 25 години беше мултикултурна држава. Рамковниот договор отприлика добро ги имаше изрегулирано сиве овие работи и немавме мултиетнички тензии. ГРОМ неколку пати на прес конференции велеше дека сценариото е оваа политичка криза да прерасне во мултиетничка криза што за жал повторно се случува“, вели Пренџов и додава дека секој има право да прави било каква платформа, но истата мора да помине на избори пред граѓаните.
Иван Стоилковиќ (Демократска партија на Србите во Македонија), Бејџан Илјаз (Демократска партија на Турците во Македонија), Ламбе Арнаудов (ВМРО НП) и Љупчо Пренџов (ГРОМ) гостуваа во „Отвореното студио“ со Бојана Димитријевска на тема „Кога едно малцинство има поголеми права од другите“
