Независната кандидатка за градоначалник на Скопје, Данела Арсовска вечерва од главниот митинг пред Филхармонија уште еднаш го повика премиерот Заев да се држи до зборот и да си поднесе оставка, откако таа во недела ќе победи на локалните избори и ќе стане новиот градоначалник на Скопје.
– Господинот Заев веќе ја најави својата оставка, истиот момент кога јас ќе победам и ќе бидам новиот градоначалник на Скопје. Тоа го мислеше како закана, но за Македонија тоа ќе биде благослов. Господине Заев, ве предизвикуваме: Вашата оставка нека биде првото ветување што сте го дале, а сте го исполниле. Затоа, драги мои скопјани, драги мои сограѓани да му помогнеме да си замине. Да ја започнеме промената во Скопје, изјави Арсовска во своето вечерашно обраќање пред скопјани.
Таа порача дека сега е време за промени кои ќе донесат поубави денови за Скопје и скопјани.
– Време е за промени, драги Скопјани. Време е за поубави денови и за модерно Скопје. Ви благодарам на сите од срце и душа за оваа поддршка и довербата што ми ја давате, рече Арсовска, додавајќи дека повеќе не смее да се дозволува политичарите кои се власт да се грижат единствено за себе и за својата моќ и на градот му е потребен градоначалник кој ќе работи за Скопје да стане поубаво место за живеење за сите граѓани.
– За мене тоа да си градоначалник не е ништо повеќе од еден механизам како да се направи Скопје поубаво место за живеење за сите нас. Верувам дека навистина сакаме промени, сакаме во Скопје, сакаме во цела Македонија, а можеме да го направиме тоа и можеме да ја направиме оваа голема промена. Не смееме и не можеме да дозволиме политичарите кои се власт да се грижат единствено за себе и за својата моќ. Кои забораваат на сите ветувања кои ги дале уште следниот момент откако ги дале овие ветувања. Бевме свесни на една гарнитура која излажа за се што вети, истакна таа.
