Голем број правници вработени во приватните фирми ќе останат без работа ако компаниите ангажираат адвокати за спроведување на нотарските платни налози и извршувања.
Измените на законите за нотари и за извршување што треба да стапат во сила од 1 јануари 2017 година, предвидуваат сите фирми, без исклучок, за предметите пред нотар или извршител вредни над 10.000 евра да ангажираат адвокат или адвокатско друштво однадвор.
Бизнис-заедницата вчера предупреди дека ваквиот начин на работа ќе ги зголемиш трошоците и затоа бара постапките да ги вршат правните служби на компаниите.
“Ангажирањето надворешни соработници за сметка на веќе постојните правни служби во компаниите, нема да значи подобро и поквалитетно завршена работа, напротив. Тоа ќе биде дополнителен финансиски товар за фирмите, што ќе предизвика реорганизација и негативни импликации врз работењето”, истакна Елена Милевска-Штрбевска, директор во Стопанската комора.
Според анкетата што ја спроведе Комората, од вкупно прашани 226 компании во различни дејности, 61,5 отсто имаат сопствена правна служба со по седум-осуммина вработени, од кои најмалку петмина се со положен правосуден испит.
“Тоа покажува дека правниците во компаниите се компетентни. Од друга страна, тие се и многу подобро запознаени со активностите на својата компанија отколку кој било друг надворешен соработник што евентуално би бил ангажиран за некоја од постапките”, нагласи Милевска-Штрбевска.
Пресметките велат дека трошокот на компаниите за адвокатите за само еден предмет би изнесувал дополнителни 700 до 12.600 денари. Но, покрај овие, плус трошоци ќе имаат и за нотарите и за извршителит.
