Младите не постојат за оваа власт. Пратениците на СДСМ вчера го одбија амандманот на ВМРО-ДПМНЕ за додавање на средства во ребалансираниот Буџет за реконструкција и одржување на студентските домови во вредност од 40 милиони денари, истакна Валентин Манасиевски од ВМРО-ДПМНЕ.
Тој истакна дека со СДСМ живееме во време на апсурди.
-Власта има пари за луксузи, 670 илјади евра за цвеќиња, 40 илјади евра за кафе и 1 милион и 600 илјади евра за лубриканти, но нема за студентите, нема за младите, и нема за оние на кои им е најпотребно. Власта, од која дел се и така наречените големи поборници за правата на младите и студентите Павле Богојески, Ивана Туфегџиќ и Дарко Каевски експресно ги одби амандманите на ВМРО-ДПМНЕ кои се во насока за подобрување на условите во студентските домови. Имајќи ја предвид се полошата ситуација во која се наоѓаат студентските домови и неодговорноста на власта сметаме дека парите кои власта ги одвојува не се доволни. Дотолку повеќе што СДСМ веќе скрати 57 милиони денари од ставката за реконструкција и одржување на студентски домови, рече тој.
Манасиевски посочи дека во услови кога секојдневно слушаме како студентите немаат топла вода, парното е слабо, а храната која им се служи на студентите не ги задоволува ниту потребните калорични и нутритивни потреби на еден човек, власта крати пари наменети за студентите.
-Почитувани господа од власта откако седнавте во фотељите ги заборавивте младите. Многу ветувате ништо не исполнивте. Ви помина половина мандат, а никаде го нема ветениот студентски град кој требаше да го почнете во првите шест месеци од вашето владеење, никаде ги нема ниту младинската гаранција, а ги нема ниту парите за подобар студентски стандард. Буквално нема ништо од она што го ветивте. Ветивте, па излажавте. Ги злоупотребивте младите за гласови. Младите се излажани и изневерени. Оваа власт која си поигра со младите мора час поскоро да си замине. Немаме два животи за да чекаме на власта да и текне дека младите се приоритет и дека чекаат од власта да им ги подобрат условите за живот. Заминете си пред штетите по младите да бидат уште преголеми, вели Манасиевски.
