Пред малку во Брисел по завршувањето на самитот бугарскиот претседател Румен Радев за прв пат најави можност Бугарија во јуни да се согласи Македонија да ги почне преговорите за членство.
Македонскиот и бугарскиот претседател Стево Пендаровски и Румен Радев утре ќе имаат средба на скопскиот аеродром, а потоа уште околу еден час и во авионот Скопје – Рим можност да разговараат за отворените прашања меѓу двете земји.
Претседателите на Македонија и на Бугарија Стево Пендаровски и Румен Радев прво ќе се сретнат на Меѓународниот аеродром Скопје, а потоа со бугарскиот државен авион ќе одат во Ватикан каде што заеднички ќе оддадат почит на делото на сесловенските просветители Светите браќа Кирил и Методиј. Оваа средба доаѓа неполна седмица по посетата на еврокомесарот за проширување Оливер Вархеји и министерот за надворешни работи на Португалија Аугусто Сантош Силва на Скопје и Софија каде што го доставија нивниот предлог за деблокирање на македонските европски интеграции, потег кој Бугарија го направи пред се поради нерешени историски прашања.