Минатата година 100 милиони денари била сумата која Владата ја издвоила за финансиските импликации од спроведувањето на Законот за употреба на јазиците а во моментов од таму немаат конкретна сума.
Ова го истакна владиниот портпарол Муамед Хоџа кој посочи дека по објавувањето на Законот за употреба на јазиците во „Служен весник“ сите институции се обврзани да создадат услови за практицирање на Законот во секојдневието.
–Секоја институција притоа треба да направи анализа на своите капацитети и зависно од таа анализа да ги преземе и чекорите со кои ќе се подобрат капацитетите и човечките ресурси во однос на остварување на Законот за јазици. Со Законот се предвидува и формирање на Инспекторат што ќе го мониторира исполнувањето на Законот од страна на сите институции. Во моментов немаме точна сума за финансиските импликации, односно колку тоа може да ја чини Македонија, но, во минатогодишниот Буџет беа обезбедени сто милиони денари за спроведување на овој Закон во пракса, потенцираше Муамед Хоџа .
