Велешанецот на возраст од 43 години, позитивен на Ковид-19, а кај кого е докажан делта сојот, повеќе од една недела бил хоспитализиран на Инфективното одделение во ЈЗУ Општа болница. Тој се вратил во земјава од Лондон, Англија, пред околу две недели.
Пациентот е во добра општа состојба, нема температура, на почеток имал само кашлица, и не покажал други симптоми на вирусот. Поради контакт со него, изолација и е одредена на неговата сопруга.
Информацијата за ,,Фокус” ја потврди епидемиологот, д-р Билјана Трајкова од ЦЈЗ Велес. Во телефонски разговор таа појаснува дека станува збор за пациент кој живее во велешко село, и немал контакт со други лица, освен со неговата сопруга, откако се вратил од Лондон.
-Уште кога пристигнал дома, на 21-ви јуни, тој се почувствувал омалаксано, не знаел дали е тоа поради патувањето, но и поради пандемијата со корона вирус, бил претпазлив и немал контакти со други луѓе. Според негови зборови, не се видел ниту со соседите и пријателите, единствено бил во контакт со сопругата со која живеат сами. Таа е единственото лице на кое му е одредена изолација поради овој случај и засега нема покажано симптоми на вирусот – појаснува д-р Трајкова.
Извор: Фокус
