Неколкумина граѓани кои биле на викенд во Лазарополе, Тресонче, Росоки, Гари и Селце, се заглавени, односно не можат да се вратат дома, поради превентивните мерки за забрана за движење во Дебар и Центар Жупа. Овие граѓани потенцираат дека местата каде што се наоѓаат се под опшина Маврово и Ростуше, а не Дебар и Центар Жупа.
Премиерот Оливер Спасовски на денешната прес конференција посочи дека е информиран за овие граѓани, но посочи дека Кризниот штаб ќе одлучи дали ќе им се дозволи да се вратат дома, или ќе мораат да останат таму.
-Контактиравме со овие лица, односно се наоѓаат во подрачјето за влез и излез на Дебар и Центар Жупа. Дадени се информации до Кризниот штаб, доколку може да се изнесат со возила. Доколку се одлучи дека не смее, ќе мора да останат таму, а ќе бидат снабдени со намирници, рече Спасовски.
Тој додаде дека сите треба да бидеме свесни дека е подобро е да им се помогне таму каде што се, доколку се одлучи дека не смеат да излезат, отколку да се наштети.