Кризата трае премногу долго. Државните институции треба да ја вратат својата кредибилност, а ЕУ е подготвена да ве поддржи во трансформирањето на вашата земја, рече амбасадорот Жбогар
Македонија доби нова препорака за почеток на преговорите за членство, но исто како и ланскиот, таа е условена со одржување на кредибилни избори и со избор на нова влада.
Ова е главниот заклучок од новиот извештај за напредокот на Македонија, кој го објави комесарот за проширување Јоханес Хан. Тој нагласи дека на Македонија изминатата година посветил големо внимание и дека земјата се наоѓа во сериозна политичка криза која мора што поскоро да заврши. Според него, сега е моментот лидерите да ја надминат кризата и да се заложат да се одржат избори кои ќе бидат признаени од меѓународната заедница.
Комесарот, исто така, побара исполнување на обврските од договорот од Пржино во кој спаѓа и непречена работа на специјалното обвинителство како и спроведување на итните реформски приоритети.
На извештајот се осврна и амбасадорот на ЕУ во земјава Самуел Жбогар. Тој нагласи дека задржувањето на препораката за преговори е добрата работа, но дека во целина тој содржи многу критики за состојбата во земјата и за политичката криза.
Според амбасадорот, политичката криза ги подвлекува предизвиците со кои се соочува и дека ЕК е незадоволна од реформите што се спроведуваат. Како пример тој ги наведе борбата против корупцијата, како и реформите во судството.
– Кризата трае премногу долго. Државните институции треба да ја вратат својата кредибилност, а ЕУ е подготвена да ве поддржи во трансформирањето на вашата земја во она што таа заслужува и сака да биде – демократско, динамично и просперитетно место, кое може да им понуди на своите граѓани стабилност и подобри перспективи за во иднина – рече Жбогар.