Зоран Заев се сети со кого разговарал кога го пцуел македонскиот народ, разговор во кој призна како тргувал со нелегално прислушкуваните материјали, како ги контролирал невладините и шарените, а и како СЈО е под целосна негова контрола. Ова е само уште една потврда за автентичноста на скандалозниот разговор.
Според Зоран Заев снимката која беше објавена е направена од Александар Верушевски, син на Зоран Верушевски на ручек во ресторан во Струмица, вели Заев на прашање на новинар за тоа кој е другиот соговорник во скандалозните снимки.
„Тој е мој пријател, но ете така одлучил така направил. Неговиот татко знаете е советник за национална безбедност и ми е голем пријател. Но, ете, Александар така одлучил така правел“, рече Заев додавајќи дека разговорот кој бил сниман е пред околу 4 години.
Од овие разговори македонската јавност имаше шанса да го слушне вистинскиот Зоран Заев, не оној кој пред камерите е со благо наклонета глава и рака на срце, човекот кој постојано говори за едно општество на сите во овие разговори впрочем ја „еб*“ мајката на пола држава.
Во развиените европски демократии политичарите поднесуваат оставки за многу помалку од ова, но влогот на Заев во ситуацијата е многу поголем од неговиот морален капацитет. Причината за ова е вмешаноста на Заев во голем број криминални афери и фактот што покрај политичка по изборите за Заев многу веројатно следи и кривична одговорност за стореното.