Можно е да има и до 136 новозаразени од мали сипаници, по епидемијата на ова заболување која вчера беше прогласена во Радишани, каде има шест случаи, бидејќи еден заболен може да зарази и до 20 здрави, невакцинирани лица. Во Радишани почнува вонредна вакцинација против морбили и таа ќе важи за шестмесечни бебиња до млади на 14 годишна возраст, за да се намали опасноста од ширење на ова високозаразно заболување од кое може да има и смртни последици.
Ова беше соопштено на денешната прес-конференција во Министерството за здравство, кое вчера ја затвори градинката во скопската населба Радишани, каде пет деца и еден возрасен се заразиле со морбили.
– Ќе се проверуваат и околу 100.000 вакцинални картони во Скопје и очекуваме да бидат пронајдени од 5.000 до 10.000 невакцинирани деца. Вон Радишани, ќе треба да се вакцинираат сите деца од една година до 14 години кои немаат доказ дека ја примиле оваа вакцина и тие ќе добијат покани. Освен во Скопје, ќе се проверуваат картоните за вакцинација на децата од целата земја. Во 2011 година имавме и еден смртен случај од ова заболување, од кое едно од 20 заболени може да се разболи од воспаление на белите дробови, а едно од илјада од менингитис. Затоа е многу важно да се зголеми опфатот со вакцинација против морбили, кој е намален на 67 отсто во Скопје, а во земјата опфатот е до 78 отсто – изјави д-р Александар Микиќ, епидемиолог во Институтот за јавно здравје на РМ.
