Самиот попис обезбедува огромен фонд податоци што на општеството му се исклучително битни при градењето стратегии и политики на развој. Нема сегмент во општеството што не зависи од податоците од пописот, вели директорот на Државниот завод за статистика.
Донесувањето на закон за попис не е тежок проблем. Може да се донесе брзо бидејќи бара просто мнозинство во парламентот, но целта не е само да се донесе закон. Целта е сите политички субјекти да застанат зад тој закон и да го поддржат. Пописот не може да го спроведете ако ја немате и таа политичка логистика и волја да се спроведе, вели директорот на Државниот завод за статистика Апостол Симовски во интервју за МИА. Тој посочува дека целта е да има консензус кај сите политички субјекти во парламентот кога се донесува овој закон. Опозицијата излезе со 23 барања што сметаше дека треба да бидат вклучени, од кои најголем дел воопшто и не може да бидат прифатени бидејќи водеа кон она што се случи со пописот во 2011 година.
