Јас да сум на местото на полицијата, вечер со качулки би им влегол на судиите кои дадоа домашен притвор за Катица Јанева. Ако украдеме во ќебапчилница, така би ни влегла полицијата. Ако ви се може, вака ќе бидете третирани, ако не, ќе бидете третирани како стока во Македонија, вели поранешниот пратеник Александар Пандов во емисијата „Само вистина“ на Канал 5.
Тој додаде дека ова не е став ниту на партијата ВМРО-ДПМНЕ, ниту пак на Телевизијата во која е гостин, туку лично негов став, дека кога би бил на местото на министерот за внатрешни работи Оливер Спасовски или обвинителката Вилма Русковска, односно моќник во државата, би го сторил тоа на судиите од Апелациониот суд. Претходно во емисијата, тој рече дека смета дека обвинителката Русковска треба веднаш да спроведе истрага за овие судии.
