Косовската полиција регистрираше зголемување на бројот на напади врз имотот на Српската православна црква во Косово, што ги зголеми патролите на теренот.
Само од почетокот на оваа година евидентирани се вкупно 13 оштетувања на црковен имот или обид за кражба.
„Заклучно со денешниот ден, пријавени се вкупно 13 случаи во објектите на СПЦ во различни региони во Косово. Од вкупниот број пријавени случаи, девет се класифицирани како случаи на тешка кражба, а четири како оштетување на имот“, рече косовската полиција во писмениот одговор на „Косово онлајн“.
Од полицијата наведуваат дека во согласност со нивните надлежности, тие ги евидентирале и делумно ги гонеле сторителите на кривични дела.
„По пријавувањето на случајот, надлежните полициски едниници излегоа на местото на настанот, спроведоа истраги и собраа материјални докази, кои беа презентирани до надлежното обвинителство и ги координираа понатамошните истражни дејствија. Во одредени случаи, извршителите се идентификувани и против нив се покренати обвиненија, а другите случаи се уште се испитуваат“, се наведува во соопштението.
Со цел да се спречат нападите врз објектите на Српската православна црква, косовската полиција спроведува посебен оперативен план за акција.
„По зголемениот број на пријавени случаи во март 2021 година, косовската полиција започна дополнителен оперативен план, „Култови“, кој се спроведува низ целото Косово, кој вклучува голем број полициски единици со цел превентивно дејствување и откривање на сторителите“, заклучува косовската полиција.
