Новата сала ќе биде лоцирана во делот на Спортскиот центар и е прва од ваков тип во нашата држава, а единствена во регионот која ги опфаќа овие три содржини.
Директорот на СЦ „Борис Трајковски“ Златко Перински денеска ја презентираше новата капитална инвестиција за изградба на нова затоврена тениска арена со гимнастичка сала и сала за боречки спортови.
– Салата ќе биде на две нивоа, на првото на 3.159 вкупна површина ќе се наоѓаат реквизитите и борилиштата за карате, бокс и кик-бокс, помошни простории, гардероби, тоалети, и остави за потребите на клубовите. Предвидено е да се постават два душека за борачите, четири татами за каратистите и пет ринга за боксерите. Дополнително, предвиден е и простор за трим патека и простор за фитнес центар, изјави директорот на СЦ „Борис Трајковски“.
На второто ниво ќе бидат сместени затворената тениска арена со простор за 500 гледачи и кафе бар, место за падел тенис и гимнастичката арена со повеќе од 20 типови справи и трибина со капацитет од 500 гледачи, дополни Перински.
