8,5 милиони евра ќе чини пописот што ќе се спроведе во април 2020 година во Македонија. На предлог од Државниот завод за статистика и во нацрт верзијата на Законот за попис се бара да нема прашање за етничка и за верска припадност, туку да има прашање за јазикот. До крајот на годинава се очекува нацрт верзијата на Законот за попис да помине на Влада, а идната година Собранието да го донесе Законот.
Во четири општини в година ќе се спроведе пилот проект на пописот и тоа во Гостивар, Зелениково, Кисела Вода и во Свети Николе. Овој пилот проект ќе чини 3,5 милиони евра, а пописот во 2020 ќе чини 5 милиони, брифираа денеска во Државниот завод за статистика.
Планирано е пописот да го спроведат 5.000 попишувачи на 8 јазици, а по двајца попишувачи ќе има во мешаните средини.
Ќе се попишува населението кое е во Македонија, како и странците кои се со подолг престој од една година во земјава, но ќе се врши попис и на отсутно население, кое е надвор од земјава повеќе од една година.
Отсутните влегуваат во вкупно население, но не во присутно, туку во отсутно население. Ќе ги пријават членови на семејство, а ќе има и повик сами да се пријават.
