Ексдиректорот на УБК, Сашо Мијалков вечерва излегува од затворот во Шуто Оризари, каде беше во притвор како осомничен за случајот „Империја“ на специјалното јавно обвинителство. Судијката Весна Димишкова го прифатила предлогот за куќен притвор на СЈО.
Кривичниот суд вчера го врати на доработка предлогот на СЈО на доуредување бидејќи истиот бил некомплетен.
Мијалков е последниот од случајот „Империја“ што излегува од притвор. Со одлуките на скопска Апелација сите други осомничени излегоа од притвор. Според шпекулациите на јавноста, тој наместо во неговиот дом, во куќен притвор ќе биде во хотелот „Мериот“, каде што неговото потесно семејство е сопственик. Како што дознаваме, Мијалков си ја променил адресата на живеење во овој луксузен хотел, кој покрај огромни соби има и фитнес центар, ресторани, барови и кафетерија.
Во предметот „Империја“ истрагата опфати 13 лица. Првично притвор им беше определен на бизнисменот Јордан Камчев, неговите соработници Ненад Јосифовиќ и Зорица Арсовска, директорот на „Пелагонија“, Цветан Панделески, и директорот на фирмата „Ексико“, Тодор Мирчевски.
