За прв пат во историјата шведскиот парламент му изгласа недоверба на премиерот Стефан Левен. Лидерот на Социјалдемократите има една недела да поднесе оставка или да распише вонредни избори.
Националистичката партија Шведски демократи ја искористи шансата да покрене гласање за доверба откако Левичарската партија ѝ ја откажа поддршката на владата поради нејзиниот план за олеснување на контролата врз изнајмувањето на новоизградени станови.
Малцинската коалиција на Левен со Зелените се потпираше врз поддршката на две помали партии и Левичарската партија откако беше формирана во 2018 година.
Ако Левен одлучи да поднесе оставка, нејасно е кој би можел да го добие мандатот за формирање нова влада, а и вонредните избори можеби нема да донесат јасен победник.
