Центрите за контрола и превенција на болести на САД (ЦДЦ) и американската Управа за храна и лекови (ФДА) препорачаа земјата да ја паузира употребата на вакцината на Џонсон и Џонсон против Ковид-19 откако беа пријавени шест случаи на „редок и тежок“ вид на згрутчување на крвта, јави Си-Ен-Ен.
Шесте пријавени случаи биле меѓу повеќе од 6,8 милиони дози на вакцината на Џонсон и Џонсон, администрирани во САД.
Сите шест случаи се случиле кај жени на возраст меѓу 18 и 48 години, а симптомите се појавиле 6-13 дена по вакцинирањето, се вели во денешната заедничка изјава на д-р Ана Шухат, главен заменик директор на ЦДЦ и д-р Питер Маркс, директор на Центарот за билошка евалуација и истражување при ФДА.
„ЦДЦ за утре свика состанок на Советодавниот комитет за практики на имунизација (АЦИП) за понатамошно разгледување на овие случаи и проценка на нивното потенцијално значење“, се вели во соопштението. „ФДА ќе ја разгледа таа анализа бидејќи ги истражува и овие случаи. Додека не заврши тој процес, препорачуваме пауза во употребата на оваа вакцина, првенствено поради претпазливост. Ова е важно и за да се осигури дека давателот на здравствени услуги во заедниците е свесен за можни вакви несакани појави и ќе може да планира правилно препознавање и управување, поради единствениот третман потребен со овој вид на тромб“.
Во изјавта на Џонсон и Џонсон за Си Ен Ен се посочува дека сите оние кои до три седмици по вакцинирањето имаат голема главоболка, болка во стомакот, болка во нога или недостиг на здив, треба да побараат медицинска помош.
Сепак, како што пренесува Си-Ен-Ен ваквите нус појави се „екстремно ретки“, односно се случуваат една во милион.
Според Д-р Карлос дел Рио, извршен соработник декан на Медицинскиот факултет на Универзитетот Емори додаде дека згрутчувањето на крвта може да биде поврзано со тоа дека вакцината на Џонсон и Џонсон е вакцина против аденовирус – ист тип како и вакцината против коронавирус на Астра Зенека.
И Европската агенција за лекови минатата недела соопшти дека ја испитува поврзаноста на вакцината Џoнсон со појавата на згрутчување на крвта, а во вторникот од компанијата објавија дека „проактивно ќе го одложат“ имунизирањето со оваа вакцинаво Европа, повикувајќи се на загриженост за коагулацијата на крвта во САД, пишува Политико
„Во моментов не е јасно дали постои каузална поврзаност помеѓу вакцинацијата со КоВИД-19 вакцина Џонсон и Џонсон и овие состојби“, пишува ЕМА во соопштението. Додаде дека неговиот безбедносен комитет, ПРАЦ, „ги испитува овие случаи и ќе одлучи дали е потребно регулаторно дејствие“.
ЕУ требаше да започне со користење на вакцината од оваа недела, планирајќи да прими 55 милиони дози до крајот на јуни.
Овој потег претставува уште еден значаен неуспех во кампањите за вакцинација на ЕУ, особено откако бројни земји во ЕУ ја ограничија употребата на вакцината Оксфорд / АстраЗенека на постара популација по слична загриженост за згрутчување на крвта. Двете се вакцини против вирусни аденовируси.
„Безбедноста и благосостојбата на луѓето што ги користат нашите производи е наш приоритет број еден“, напиша компанијата во соопштението за јавноста. „Тесно соработувавме со медицински експерти и здравствени власти и силно ја поддржуваме отворената комуникација на овие информации со здравствените работници и јавноста“.
Во меѓувреме, британските регулатори се очекуваше да ја одобрат вакцината во наредните денови, пишува „Тајмс“ .
