Реката Пчиња се излеа на просторот околу Пелинце, во близина на Меморијалниот центар АСНОМ, информираа денеска повеќе надлежни институции, чии екипи се излезени на терен, водостопанство „Кумановско-липковско поле”, РЦУК Куманово и општина Старо Нагоричане.
Вода има на просторот, но не се зафатени ниту објектот на меморијалниот центар, ниту пак ресторанот со кој стопанисува „Чистота и Зеленило”.
– Наши вработени нè информираа дека има излевање на Пчиња на просторот, но водата не е навлезена во меморијалниот центар АСНОМ. Поучени од претходното искуство, подготвени сме имаме обезбедено вреќи со песок и ќе интервенираме доколку има потреба, изјави директорот на НУ Музеј Куманово, Богдан Таневски.
Од РЦУК Куманово и од Водостопанство „Кумановско-липковско поле” велат дека водата не навлегла во ресторанот кој е под надлежноста на „Чистота и Зеленило”.
Градоначалничката на Старо Нагоричане, Жаклина Јовановска изјави дека екипите вршат увид на мостовите по течението на Пчиња во оваа општина.
– Во моментот нивото на Пчиња е високо и правиме увид дали има препречени, дрвја, гранки на одрдени локации и дали ќе има потреба од интервенција, изјави Јовановска.
Екипи на Водостопанство „Кумановско липковско поле” работат на бедем на патот за Бељаковце Куманово. Сепак, оттаму укажуваат дека нивото на Пчиња е критично на мостот кај Драгоманце, кај Коинце, кај Пелинце.
Во кумановско, пак, водостопанство интервенира со механизација кај селото Пчиња. Во неделата се излеаја Крива река и Пчиња на неколку критични точки, зафаќајќи обработливо земјиште, викенд куќи, помошни простории.
