Дипломатската професија не е наградно патување за заслужни партиски кадри, туку лицето и гласот на државата и е од витално значење истите да бидат вистински професионалци, да имаат знаење и вештини, како и искуство во полето на воспоставување соработка со меѓународни организации и со други држави, вели професорката Силјановска за информациите според кои партиски апаратчици и политичари ќе заминат во нова дипломатска мисија во важни меѓународни центри.
“Во таа смисла, мора да им се даде шанса на најспособните и најквалитетните кадри да ја претставуваат државата, со нулта толеранција за непотизам, партиски и други влијанија во дипломатијата.
Ни треба целосна професионализација на дипломатската служба. Да се обезбеди соодветно образование и тренинг, услови за развој и размена како и зголемување на присуството и активностите на нашите дипломати во меѓународните организации.
Потребно е стратешки да се таргетираат земјите кои ни се важни по различен основ (политичка тежина, економска соработка, дијаспора итн.) и да се реорганизира мрежата и активностите на дипломатско-конзуларните претставништва низ светот.
Дипломатијата е клучна алатка за малите земји. Ние немаме никаков простор за грешка во играта на меѓународната сцена. Секој влог во дипломатијата се враќа неколкукратно за земјата”, смета Силјановска.