Новинарската истражувачка мрежа – ИРЛ Македонија, објави истражување за начинот на распределба на советничките позиции во министерските кабинети, кои, според новинарите на ИРЛ не се распоредуваат мериторно – согласно квалфификациите, туку исклучиво како партиска заслуга.
За пример се земени последните две вработувања во кабинетот на министерот за земјоделство, како и во кабинетот на министерот за труд и социјални работи.
– Снимателот и монтажер Тони Николовски, сопруг на поранешната советничка на премиерот Зоран Заев, Ленче Николовска, стана посебен советник за односи со јавност на министерот за земјоделие и шумарство. Телевизиската водителката Зорица Андреева и’ стана советник за евроинтеграции на министерката за труд и социјала Јагода Шахпаска. И двајцата не се експерти во својата област. Но, ним и речиси целиот список на посебни советници во Владата ги врзува една работа – лојалноста кон владејачките партии, пишуваат од ИРЛ.
Во последниот извештај на Европската Унија, токму сегментот за реформа во јавната администрацја е помеѓу послабите алки во процесот на исполнување на Копенхашките критериуми.
„Државната комисија за спречување на корупција продолжи да ги адресира обвинувањата за непотизам, кронизам и политичко влијание во процесот на вработување на во јавниот сектор. Треба да се обезбеди соодветно следење на извештаите и препораките на Државната комисија“, пишува во Извештајот.
Токму министрите ги направија првите вработувања во јавната администрација. Во следните две недели ќе се бираат функционерите од третиот ешалон – директори на јавни институции.
