Револтиран припадник на специјалната полициска единица „Тигар“ до нашата редакција испрати писмо во кое го критикуваше министерот за внатрешни работи Оливер Спасовски, кој според него напразно се фалел со пожртвуваноста на единицата. Според специјалецот, Оливер Спасовски е човекот кој се дружеше со луѓето кои посакуваа „Куманово да им се деси“ на полицајците, а такви луѓе не можат да бидат на чело на полицијата
Целото писмо, објавено на сервисот „Џастпејстит“ го објавуваме во целост:
„Те гледам денес Оливер се сликаш и фалиш со пожртвуваноста на Единицата Тигри и држиш говор како Единицата треба да работи и работела досега.
Да ти порачам дека Единицата секогаш е на својата задача и секогаш се жртвувала за да обезбеди безбедност и сигурност на граѓаните. А ти Оливер за мене никогаш нема да бидеш почитуван, ниту некогаш ќе ти се обраќам така. Ти за мене не си министер затоа што не сакам пак Куманово да ми се деси.
Ти беше со тие кои ни посакуваат Куманово да се повтори, гордо чекореше со нив, а никогаш не најде време и доблест да се извиниш. Таму загинаа наши 8 браќа со кои сме пребродиле многу тешки моменти, акции за одбрана за државата. Оливере тие беа луѓе со кои делевме се, луѓе со кои често поминувавме неспиени ноќи за да ја чуваме безбедна и мирна државата, за граѓаните на оваа држава да можат мирно да спијат. За да можеш и ти мирно да спиеш.
Немаш право да зборуваш за политички мотивирано делување на Единицата затоа што веднаш по настаните во Куманово ти и Заев среќни и насмеани се сликавте на местото каде загинаа нашите браќа, на местото каде што беа загрозени нашите животи и животите на жителите Куманово. Наместо да дадеш малку почит со месеци настанот го користиш за политички цели и шириш лаги низ Македонија.
Денеска без срам им честиташ на Тигрите додека претходно не омаловажуваше, не понижуваше и се смееше на гробовите на нашите браќа кои загинаа за Македонија.“
