Дете на новинарската школа на МТВ, некогашен новинар и ТВ водител, бездруго впечатлив ТВ лик кој иако со години не е пред камерите, оние што го гледале се’ уште го паметат.
Игор Филевски – Филе или по насловот на последниот и веројатно највпечатлив проект, попознат како „Филе – Топки“ оддамна не е ниту на ТВ, а ниту во Македонија, која пред десеттина години ја напушти барајќи ја среќата и парчето леб, по белиот свет.
Замина, но како и на секој вистински Македонец срцето и душата му останаа во Македонија, која секогаш кога може ја посетува, зашто само едно место на светот се вика – „татковина“… и дом.
Барселона и Аргентина, исто така никогаш не ги напушти… Се разбира само како нивен „најверен“ навивач, на славниот шпански или поточно каталонски клуб и големата јужноамериканска колевка на фудбалот, по кои верувале или бне, им ги даде и имињата на своите деца: ќерката од првиот брак која се вика Аргентина и синчето од вториот, кој го доби името Лео, по фудбалскиот волшебник, Лео Меси.
Неговото последно упориште „ветениот остров“ – Малта, каде Филе последниве години ( од 2015 г.) е стациониран и живее со својата втора сопруга Весна и малиот Лео! Редовен на социјалните мрежи, постојано известува, коментира, дебатира, споделува фотографии, изјави, мисли и цитати, бунтовен и праведен како и секогаш…
Така беше и овој пат, со неговата последна објава на Фејсбук, со која за жал, загрижи многумина, зашто Филе ја споделил од болница. Легнат во болничка постела, со „жици и матракуки“ на себе, оние кои не знаат што му е ги остави во грижи и недоумица без да објасни дали е заради Ковид-19 во болница или е можеби нешто друго во прашање?
Но, дека беше добро ова утро за него – не беше, икао, како што самиот вели – „ќе биде“… Што и да е – ќе помине!
Ама затоа пак онаков како што го дал Бог, екс водителот наместо да го кометира своето здравје и причините зошто е в болница, Филе не пропушти да го искоментира и спореди тамошниот со овдешниот здравствен систем. Компарација на она нивното што е вистинска социјална држава и ова нашево, што е само „бледа имитација на животот“ во сите сегменти, па и во тој.
„Добро утро, иако за мене не е, но ќе биде…
Сакам да одбележам дека вторпат лежам во болница, вторпат на државна клиника (во која не плаќам ни цент за комплетната услуга и медикаментите), во две различни држави досега и секогаш добивам неспоредливо поголема грижа и врвни здравствени услови за разлика од матичната држава во која се родив, растев, овозраснував и плаќав постојано даноци и здравствено осигурување. (приватните клиники во МК се исклучок од муабетов, ама тоа е се’ за кеш)
И како да не ми е криво?
Како да не ми е мака?
Како да замижам пред тој факт?
Како? А Македонија како земја и територија ќе ми остане “нааај” секогаш во срце, каде и да сум, ама како земја…“ – напиша Филе во пораката споделена покрај фотографијата на која лежи во болничка постела.
А што да се каже… Системот, овој нашиов „божемен“, белким време е да се демонтира. Да се менува… Од корен! А на Филе му го посакуваме сето здравје на овој свет и… „Што и да е – да помине“!
