Владата на денешната седница донесе одлука со која oд утре целосно престанува да важи Одлуката за ограничување на движењето на граѓаните, соопшти министерот за внатрешни работи Наќе Чулев.
– Благодарeн сум на граѓаните за високото ниво на одговорност и свесност кои ги покажаа во изминатиот период.
Благодарам и на полициските службеници и на сите вработени во Министерството за внатрешни работи за професионалниот и одговорниот пристап во обезбедување на здравствената сигурност на граѓаните.
Силно апелирам до граѓаните да ги почитуваат препораките и мерките за употреба на заштитна опрема кои се насочени кон заштита на нивното здравјето, вели Чулев.
Чулев упати благодарност и до неговите колеги, полициските службеници, за се што направиле овие 67 денови за државата.
– Почитувани колеги сите изминати 67 денови уште еднаш докажавме дека припадниците на полицијата се чесни, одговорни и посветени професионалци кој ја сакаат својата земја и својот народ.
Вашата работа е составена од изенадувања и предизвици, за жaл најчесто негативни, а ваша обврска е секогаш подготвено и решително да одговорите на нив. Горд сум што можам да констатирам дека заеднички успеавме да го совладаме еден од најсериозните предизвици во поново време. Успеавме да го заштитиме здравјето и животот на граѓаните.
Ви благодарам за се што направивте за нашата држава. Јас како министер сум неизмерно благодарен за вашиот придонес во надминување на оваа состојба, додава Чулев