Екипите на Град Скопје почнаа да го расчистуваат кејот на реката Вардар околу новиот пешачки мост кај зградата на Македонскиот народен театар.
Овој дел од кејот скоро 8 години не беше прооден за пешаци и за велосипедисти поради градежните работи и натрупаниот градежен материјал поради изградбата на „Панорамското тркало“. Изградбата на мостот е готова, „Панорамско тркало“ нема, а сега се работи на конечно ослободување и на оваа делница од кејот, за граѓаните да можат непречено да ја користат.
Од овој потег досега се подигнати 27 кубни метри градежен материјал. Чистењето ќе продолжи и во наредните денови.
Започнуваме со расчистување и подготовка за конечно отварање на кејот, после повеќегодишната непроодност заради изградба на мостот на “Панорамското тркало”.
Мостот е готов, тркало ќе нема, кејот конечно прооден, напиша скопскиот градоначалник Петре Шилегов на фејсбук.
