Новинарката на МИА, Ирена Радовановиќ добила смртни закани од лице со лажен профил на Фејсбук, на кој, според новинарката, нема фотографии, нема пријатели во листа и е наменски отворен за да се заканува на неистомисленици.
Радовановиќ во својата колумна за „Дневник“ ги обелодени заканувачките пораки, а за ТВ Нова раскажува како ги доживеала ваквите заплашувања.
Радовановиќ вели дека од пораките може да се забележи дека не се работи за неписмен човек, туку образован кој го владее добро правописот. Се сомнева дека зад заканите стојат лица кои сакаат на ваков начин да ја исплашат и да извршат притисок врз новинарите.
Новинарката очекува надлежните органи да откријат кој стои зад овие пораки, а личноста да биде соодветно санкционирана. Одговорност мора да има, а новинарите не смеат да бидат изложени на закани по живот и да живеат во страв, вели Радовановиќ.
Јана Јосифоска