Денеска во Кривичниот суд беше објавена пресудата за случајот „Монструм“, односно за петкратното убиство кај Смиљковското Езеро, што се случи на 12 април 2012 година.
Доживотен затвор добија Алил Демири и браќата Агим и Африм Исмаиловиќ, за кои судијата рече дека се виновни за кривичното дело „тероризам“. Обвинетиот Хаки Азири се осудува на казна затвор од 9 години, а Фејзи Азири е осуден на казна затвор од 15 години.
Единствено ослободителна пресуда доби обвинетиот Сами Љута.
-Овде никако не се работи за обичен случај, туку станува збор за монструозно садистичко убивање и ликвидирање на деца, кои едвај станале полнолетни. Замислите како се чувствувале овие деца, клекнати на своите колена, што ли им прошло во таа секунда и како се чувствувале, истакна судијата.
Во претходната постапка за убиството на момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски на доживотен затвор беа осудени Алил Демири, Африм и Агим Исмаиловиќ, Хаки Азири и Сами Љута. Врховниот суд во декември 2017 година ги укина пресудите, по што случајот почна од почеток, во надлежност на СЈО, односно на обвинителите Фатиме Фетаи и Гаврил Бубевски.
Со претходната пресуда донесена на 30 јуни 2014 – Доживотна казна затвор за тероризам добија Алил Демири, Африм Исмаиловиќ, Агим Исмаиловиќ, Фејзи Азири, Хаки Азири и Сами Љута кој денеска доби ослободителна пресуда.
