Македонскиот активист од Бугарија, Атанас Кирјаков-Војводата, реагира за изјавата на експремиерот Љупчо Георгиевски дека Гоце Делчев и другите македонски револуционери и интелектуалци од илинденскиот период пишувале на бугарски јазик, како и за неговиот предлог за надминување на ќорсокакот во односите меѓу Македонија и Бугарија.
„Господине Љубчо Георгиевски,
Ние, етничките Македонци, кои сме родени, живееме и работиме во Пиринскиот дел на Македонија, имаме напишано и отпечатено во печатниците во Благоевград и во Софија поголем број наши весници на бугарски. Имаме отпечатено во печатниците во Благоевград на бугарски и поголем број наши програмски документи на нашите македонски здруженија, македонска организација, македонска партија (устави, правилници, летоци итн.). Но, тоа што нашите весници и нашите документи се напишани на бугарски не значи и не нè прави Бугари. Ние сме си Македонци! Етнички Македонци!
Ви пишуваме по повод едно ваше интервју во кое вие спомнувате дека сите документи на МРО, ТМОРО, ВМОРО, ВМРО (устави, правилници, писма и др.) се пишувани на литературен бугарски. Исто така разбравме дека предлагате Решение од 5 точки за ‘излегување од ќорсоскакот’ во спорот меѓу Р. Бугарија и Р. Македонија, при што во една од точките предлагате Р. Македонија да декларира дека се откажува од македонското малцинство во Бугарија. Ако тоа е вистина и ако Вие лично се откажувате од нас, сепак Ви благодариме за досега добиената помош од Вас за да излегува нашиот весник ‘Народна волја’ и за помошта од Вас во текот на минатите години за одржувањето на други наши културни манифестации во Пиринскиот дел на Македонија“, вели еден од основачите на Обединетата македонска организација „Илинден“ и кандидат за градоначалник на Благоевград на локалните избори минатата година.
На крајот од своето јавно обраќање до Георгиевски, Кирјаков приложува фотографии од македонските весници што излегуваат во Пиринска Македонија.
