Британското Министерство за здравство денес објави дека сите домаќинства во Англија со деца кои посетуваат основно или средно училиште ќе имаат можност да добиваат два брзи теста за ковид-19 еднаш неделно, со цел да ги поддржат владините напори за што побрзо враќање на учениците во училишните клупи.
Британскиот премиер Борис Џонсон минатата недела објави дека е изготвен план за укинување на ограничувањата и нуди претпазлив пристап во спречување на повторно воведување на сеопфатни ограничувања што и наштетиле на британската економија.
Џонсон изјави дека враќањето на учениците на училиште од 8 март, со минимални социјални контакти на отворено, е приоритет во првата фаза.
Министерството за здравство соопшти дека комплетите за брзо тестирање ќе бидат достапни од утре на повеќе од 500 локации, но дека тестовите ќе бидат спроведени и на работните места и во локалните центри за тестирање.
Учениците од основните и средните училишта ќе бидат тестирани двапати неделно, најпрво во училиштата, а потоа ќе добијат тестови за домашна употреба.
Бројот на новоинфицирани лица во Велика Британија се намалува и сега е еден од 145, објави Националниот завод за статистика.
