Како земја што одржува пријателски односи со Бугарија и Македонија, ќе се обидеме на секој начин да го олесниме решавањето на нивните разлики, изјави грчкиот министер за надворешни работи, Никос Дендиас, во интервју за Еуроњуз.
Грчкиот министер за надворешни работи ја повтори поддршката на Грција за европската перспектива на регионот.
„Следејќи ја Солунската агенда, Грција е силен поддржувач на европската перспектива на Балканот и, се разбира, на Западен Балкан, а особено во конкретниот случај на Македонија и Албанија. И, како земја што одржува пријателски односи со Бугарија и Македонија, ќе се обидеме на секој начин да го олесниме решавањето на нивните разлики. И сигурен сум дека сите ќе го ценат тоа “, рече Дендиас.
На прашањето дали Грција ќе преземе конкретни иницијативи, шефот на грчката дипломатија рече дека „иницијативата е многу силен збор“ и додаде дека тие се пријатели со секого и се обидуваат да им помогнат на сите.
„Но, морам повторно да кажам дека треба да ја видиме големата слика и големата слика е иднината на Балканот во Европската унија“, рече грчкиот министер за надворешни работи во едно интервју.
