Португалија ќе ги отвори своите плажи на 6 јуни, изјави денеска премиерот Антонио Коста, повикувајќи ги граѓаните да ја преземат апликацијата што ќе им овозможи да проверат дали има слободни места на плажата на која сакаат да одат.
Според новите правила за плажите, групите ќе треба да се одвоени 1,5 метар едни од други, лежалките ќе се изнајмуваат само на половина ден, а групните спортови нема да бидат дозволени.
Но, пoлицијaтa нема да ги следи плажите, рече Коста, повикувајќи ги луѓето да се придржуваат кон правилата.
– Плажите треба да бидат места за одмор, рече Коста.
Португалската агенција за животна средина разви апликација што ќе собира податоци во реално време за тоа колку луѓе се на плажа, така што во секое време ќе може да се проверува колку луѓе има на неа.
Владата со мобилните оператори сега работи на тоа да се овозможи собирање податоци не само за тоа колку луѓе се на плажа, туку и како се распоредени, рече Коста.
Португалија од понеделник ќе ја почне втората фаза на ослободување на ограничувањата, што значи дека ќе се отворат рестораните, музеите, кафулињата и училиштата за одредени возрасти. Португалија на 4 мај дозволи отворање на помалите продавници и ги олабави ограничувањата во однос на патувањата.
Економските показатели предупредуваат дека во првиот квартал од годината економскиот раст во Португалија е помал за 3,9 проценти во однос на минатата година.
Невработеноста значително се зголеми, рече Коста.
Пaдoт на БДП најмногу ќе се должи на ситуацијата во туризмот, каде што бројот на ноќевања опaднa за 60 проценти во март во однос на истиот период лани.
