Претседателите на Македонија и Бугарија, Стево Пендаровски и Румен Радев во денешниот телефонски разговор се согласиле дека европските перспективи на земјите од Западен Балкан, се од клучна важност за зајакнување на стабилноста и се важен знак за развојот на целиот регион.
Радев, како што е објавено на сајтот на бугарскиот претседател , смета дека долгорочен и одржлив напредок на Македонија е неопходен за воспоставување добрососедски односи со Бугарија.
Но, според него, Бугарија „очекува јасни законски гаранции дека единството на бугарската нација и нашето културно и историско наследство, како клучни елементи на нашиот национален идентитет никогаш нема да бидат доведени во прашање од надворешни фактори“.
Радев околу можната блокада од страна на Бугарија вели:
„Најсоодветна опција за да се избегне таква ситуација е да се обезбеди дека поглавјето 35 од Преговарачката рамка за Република Северна Македонија ќе ја вклучи бугарската Декларација, едногласно усвоена од Националното собрание пред една година, со јасни критериуми и временски рокови, кои треба да се почитуваат во текот на преговарачкиот процес.
Ако таква одлука е невозможна, нашата земја ќе работи на постигнување билатерален договор со Република Северна Македонија, со кој билатералните прашања би се решавале во духот на пријателството и добрососедските односи“, изјавил Радев.