Првиот заменик на постојаниот претставник на Русија во ООН, Дмитриј Полјански, оцени денеска пред Генералното собрание на светската организација дека нацрт-украинската резолуција во ООН е „поопасна од Ковид-19“, посакувајќи и на Украина „брзо закрепнување од вирусот на лудилото – Мајдан“.
Коментирајќи ја нацрт-украинската резолуција за „проблемите со милитаризацијата на Крим, Црното Море и Азовското Море“, рускиот дипломат оцени дека текстот предложен од Украина е антируски, „одразува лудило“ и дека не станува збор за Крим, туку за влошување на односите на Киев со Москва.
„Киев не е во можност да прифати дека народот на Крим самостојно одлучил за својата судбина“, рече Полјански, истакнувајќи дека реториката на Киев, исполнета со омраза и национализам, доведува до таква резолуција што нема ефект.
