Американскиот Стејт департмент објави извештај во кој ја обвинува Русија за „активно помагање“ на присилна експлоатација на севернокорејски работници и ја вклучи во списокот на 11 земји во кои властите ги кршат американските норми против трговијата со луѓе.
Стејт департментот тврди дека Русија продолжила да прифаќа севернокорејски граѓани, издавајќи им скоро три илјади нови туристички и студентски визи во 2020 година. Соединетите држави сметаат дека ова е обид да се заобиколат резолуциите на Советот за безбедност на ООН, насочени кон ликвидација на севернокорејските работнички логори во странски земји.
„(Руската) влада активно учествуваше во практиките на присилна работа на севернокорејските работници. Владата не ги провери севернокорејските работници за знаци на трговија со луѓе и не идентификуваше севернокорејски жртви на трговија со луѓе, и покрај веродостојните извештаи од претходните години дека Северна Кореја има работни кампови во Русија и присилно експлоатира илјадници севернокорејски работници“, се вели во извештајот.
Во извештајот за трговија со луѓе во 2021 година се наведени 11 земји со документирани политики или модели на трговија со луѓе, трговија со програми финансирани од државата, принудна работа во државни здравствени услуги или други сектори, сексуално ропство во владини кампови или регрутирање на деца војници.
Покрај Русија, на списокот се Кина, Авганистан, Мјанмар, Куба, Еритреја, Северна Кореја, Иран, Јужен Судан, Туркменистан и Сирија.
