Првиот воз претворен во единица за интензивна нега во Италија беше претставен на централната железничка станица во Милано и е во состојба да пренесува и лекува пациенти во специјално опремени вагони. Тој воз ќе и служи на целата земја за време на пандемија или временска непогода.
Болничкиот воз може да пренесе до 21 пациент на апарати за дишење и ќе патува од север кон југ, низ цела Италија, но и во странство, каде што е потребна медицинска помош за време на епидемијата. Може да се користи и како болница ако нема место во здравствените установи.
Претседателот на регионот Ломбардија Атилио Фонтана за медиумите изјави дека возот, единствен во земјата, е резултат на одлична соработка помеѓу регионот, цивилната заштита и регионалната агенција за итни случаи во Ломбардија (АРЕУ).
Пред една година, идејата за воз со такви карактеристики се појави затоа што ни требаше превозно средство, но не и авион, кога станува збор за критични ситуации, објасни директорот на АРЕУ, Алберто Золи.
Во март минатата година, транспортиравме 120 пациенти со интубација, како и оние на вентилација, од кои 80 беа транспортирани во други региони и 40 во Германија. Досега имаме 30 респиратори кои се во Бреша и други провинции во Ломбардија. Ова е вистинска клиника за реанимација на тркала, рече Золи.
Возот има осум вагони и две локомотиви. Се состои од три вагони наменети за лекување на најтешките пациенти, т.е. оние што се на апарати за дишење, во два вагона има техничка служба од која зависи функционирањето на целиот воз.
Два вагона служат како спални соби за вработените, како и за здравствено-техничка координација, а има и зона за филтрирање, која е неопходна за преместување од заштитена и чиста зона во оперативна. Еден вагон служи како магацин за сите потребни медицински материјали.
Максималниот број на здравствени работници што можат да бидат во возот е 45, вклучително и технички персонал.
Медицинска опрема во возот
Возот е опремен со 21 респиратор, еден ултразвук, два уреди за хемогас, 21 монитор, три уреди за следење и друга опрема.
Благодарение на донацијата од 260.000 евра од Фондацијата „Elizabeta Franki“, беше можно да се снабди железничката болница со потребните инструменти за спасување животи.
Во исто време, во Рим, на Пјаца деи Цинквеченто, беше претставен првиот центар за возови „Рим – термини“, благодарение на соработката на регионот Лацио, италијанскиот Црвен крст и италијанските железници, каде е можна вакцинација.
Овој центар има 21 место за вакцинација, од кои две се наменети за инвалиди.
Кога ќе е целосно подготвен за работа, се планира до 1.500 луѓе на ден да се вакцинираат во возот.
