Додека милиони луѓе го чекаат својот ред за вакцина против Ковид-19, што може да биде за неколку месеци, онлајн измамници преку електронскa поштa и разни платформи за комуницирање бараат жртви, тврдејќи дека можат да им достават вакцини во рок од неколку дена за 150 американски долари, пишува „Ројтерс“.
Измамите со вакцините за Ковид-19 се во пораст, според официјални податоци на европски и американски органи и официјални лица, кои предупредуваат на измами со пари и лични податоци. Преку онлајн истражувањето, по dark web форумите и на апликацијата за допишување Телеграм, „Ројтерс“ наиде на седум различни понуди за наводни вакцини за Ковид-19.
Измамите меѓудругото вклучуваат и мејлови преку кои се ветува влез во наводно тајни списоци за ран пристап до вакцини. Американското ФБИ и Интерпол предупредија на појави на шеми за измама поврзани со пандемијата, велејќи дека лажните лекови и вакцините што се рекламираат на лажните веб-страници може да претставуваат сајбер закани и значителен ризик за здравјето на луѓето, па дури и животот.
На форумот „Агарта“, лажни вакцини за Ковид-19 биле понудени покрај кокаин, опиоидни лекови, „високо квалитетни лажни пари“, пиштоли и картички за подароци. На објавите се гледаат фотографии од вакцини, преземени од сервисите за фотографии на интернет и се нудат ампули за 500 и 1.000 долари, или пак еквивалентната сума на Биткоин.
На друга веб-страница пак, продавач кој тврди дека е од „Институтот за наука во Вухан“ нуди вакцини за Ковид-19 во замена за донација, а во меѓувреме барал од купувачите да му приложат нивна медицинска историја.
Повеќе од двојно во октомври се зголемија и домените на веб-страниците кои го содржат зборот вакцина, во комбинација со Ковид-19 или коронавирус, кога првите легитимни вакцини веќе се приближуваа до процесот на одобрување од страна на регулаторите, посочија од компанијата „Recorded Future“ која ги следи измамите со пандемијата на интернет.