Во Вухан, епицентарот на пандемијата на коронавирус, повторно се отворени ноќните клубови, додека за остатокот од светот засега тоа може само да биде сон. Ноќниот живот во Вухан се враќа во полн ек, речиси седум месци по укинувањето на строгиот карантин, а младите тоа го прифатија веднаш, јавува Wion news.
На социјалните мрежи се споделуваат видеа од забави и концерти, кои во моментот се незамисливи во останатиот дел од свтеот, поради пандемијата, и строгите мерки. Но, младите жители на Вухан уживаат во ноќни излегувања, гужви, дружење по клубови и храна на улични тезги, надополнувајќи го загубаното време во последната година.
Многумина се надеваат на такви сцени во 2021 година по глобалното воведување на вакцините Covid-19.
„Се чувствувам како да живеам поинаков живот по првиот бран на епидемијата во Вухан“, изјавила Џанг Квионг (29), која својот роденден го прославила со пријателите во преполн паб.
Нема пријавени нови случаи на локално пренесување на коронавирус во Вухан уште од 10 мај, иако градот и целиот регион беа извесен период во најстрогиот карантин во светот.
Градот со 11 милиони жители беше отсечен од остатокот на Кина, а затворањето започна на 23 јануари. Патиштата беа блокирани, возовите, автобусите, а авионите не можеа да слетаат во градот. Скоро 3.900 од 4.634 смртни случаи предизвикани од коронавирусот во Кина, се забележани во Вухан.
Младите зборуваа за тоа како биле затворени во своите домови со месеци, а многумина го искористиле тоа време да се подготват по повторното отворање.
– За време на епидемијата, Вухан беше мртов град. Сега сите излегуваат да јадат и да се забавуваат. Не мислам дека имаше многу луѓе надвор дури и пред епидемијата, изјави рок-музичарот Ји Ји за Wion news.
